ಖಾನಾಪುರ:ಹೊಂದಾಣಿಕೆ ಕೋರತೆ ಮರಿಚಿಕೆಯಾದ ಅಭಿವೃದ್ಧಿ ಕಾರ್ಯಗಳು : ಲಿಂಗನಮಠ ಗ್ರಾ.ಪಂ ಗೋಳು ಕೇಳುವವರು ಯಾರು ?
ಹೊಂದಾಣಿಕೆ ಕೋರತೆ ಮರಿಚಿಕೆಯಾದ ಅಭಿವೃದ್ಧಿ ಕಾರ್ಯಗಳು : ಲಿಂಗನಮಠ ಗ್ರಾ.ಪಂ ಗೋಳು ಕೇಳುವವರು ಯಾರು ?
ಕಾಶೀಮ ಹಟ್ಟಿಹೊಳಿ, ಖಾನಾಪುರ
ಖಾನಾಪುರ: ಜೂ 20: ತಾಲೂಕಿನ ಲಿಂಗನಮಠ ಗ್ರಾಮ ಪಂಚಾಯತಿಯಲ್ಲಿ ಚುನಾಯಿತ ಜನಪ್ರತಿನಿಧಿಗಳ ಹೊಂದಾಣಿಕೆ ಇಲ್ಲದೆ ಇರುವುದು, ಪಂಚಾಯತ ಅಭಿವೃದ್ಧಿ ಅಧಿಕಾರಿ ಹಾಗೂ ಹಲವು ಅಧಿಕಾರಿಗಳ ಕೊರತೆಯಿದ್ದು ಗ್ರಾಪಂ ಅಭಿವೃದ್ಧಿ ನೆನೆಗುದಿಗೆ ಬಿದ್ದಿದೆ.
ಲಿಂಗನಮಠ ಗ್ರಾಪಂ ವ್ಯಾಪ್ತಿಯಲ್ಲಿ ಬರುವ ಲಿಂಗನಮಠ, ಹೊಸಲಿಂಗನಮಠ, ಚುಂಚವಾಡ, ಗುಂಡೋಳ್ಳಿ ಮತ್ತು ಪೂರ ಗ್ರಾಮಗಳಲ್ಲಿ ಕಳೆದ ಸುಮಾರೂ ದಿನಗಳಿಂದ ಯಾವೊಂದು ಅಭಿವೃದ್ಧಿ ಕಾಮಗಾರಿಗಳು ನಡೆಯುತ್ತಿಲ್ಲ. ಯಾಕೆಂದರೆ ಕಳೆದ ಕೆಲವು ದಿನಗಳಿಂದ ಚುನಾಯಿತ ಜನಪ್ರತಿನಿಧಿಗಳ ನಡುವೆ ಹೊಂದಾಣಿಕೆ ಇಲ್ಲದೆ ಇರುವುದು, ಹಲವಾರು ಜನಪರ ಕಾರ್ಯಗಳಲ್ಲಿ ಅವ್ಯವಹಾರ ಆಗಿದೆಯೆಂದು ಗ್ರಾಮಗಳ ಜನತೆ ಅಲ್ಲಲ್ಲಿ ಮಾತನಾಡುವ ಸದ್ದು ಕೇಳಿಬರುತ್ತಿದೆ. ಹೀಗಾದರೆ ಜನರ ಪರಿಸ್ಥಿತಿ ಅಧೋಗತಿ ಎಂಬ ಭಯ ಜನರಲ್ಲಿ ಕಾಡತೊಡಗಿದೆ.
ಈ ಬಗ್ಗೆ ಯಾವುದೇ ಚುನಾಯಿತ ಜನಪ್ರತಿನಿಧಿಗಳಾಗಲಿ, ಸಂಭಂಧಪಟ್ಟ ಅಧಿಕಾರಿಗಳಾಗಲಿ ತಲೆಕೆಡಿಸಿಕೊಳ್ಳಿತ್ತಿಲ್ಲ. ಹೀಗಾಗಿ ಗ್ರಾಪಂ ವ್ಯಾಪ್ತಿಯಲ್ಲಿ ಸಾರ್ವಜನಿಕರ ಕುಂದು-ಕೊರತೆ ಆಲಿಸುವವರೇ ಇಲ್ಲದಂತಾಗಿದೆ. ಇನ್ನು ಗ್ರಾಪಂ ಸದಸ್ಯರು ವಾರ್ಡಗಳಲ್ಲಿ ಆಗಬೇಕಾದ ಅಭಿವೃದ್ಧಿ ಕೆಲಸಗಳ ಬಗ್ಗೆ ಗಮನಹರಿಸುತ್ತಿಲ್ಲ. ಗ್ರಾಪಂನಲ್ಲಿ ಸಿಬ್ಬಂದಿ ಕೊರತೆಯಿದ್ದು, ಆಡಳಿತ ಮಂಡಳಿಯವರು ತಲೆಕೆಡಿಸಿಕೊಳ್ಳಿತ್ತಿಲ್ಲ.
ಅಭಿವೃದ್ಧಿ ಯೋಜನೆ ಸಿದ್ಧಪಡಿಸಬೇಕಾದ ಗ್ರಾಮ ಪಂಚಾಯತಿ ಅಭಿವೃದ್ಧಿ ಅಧಿಕಾರಿ ಹುದ್ದೆ ಕಳೆದ ಸುಮಾರು ದಿನಗಳಿಂದ ಖಾಲಿ ಇದ್ದು, ಅನೇಕ ಜನಪರ ಕಾಮಗಾರಿಗಳು ನೆಲಕಚ್ಚಿವೆ, ರಸ್ತೆ, ಗಟಾರು, ಕುಡಿಯುವ ನೀರಿನ ಸಮಸ್ಯೆ, ಸ್ವಚ್ಛತೆ ಹಾಗೂ ಇನ್ನಿತರ ಅಭಿವೃದ್ಧಿ ಕಾರ್ಯಗಳು ಕುಂಠಿತಗೊಂಡಿವೆ. ಆದ್ದರಿಂದ ಶೀಘ್ರ ಪಿಡಿಒ ನೇಮಿಸಬೇಕೆಂಬುದು ಜನರ ಒತ್ತಾಯವಾಗಿದೆ.
ಜನತೆ ಆತಂಕ:
ಸರಕಾರದಿಂದ ಬಿಡುಗಡೆಯಾಗುವ ಅನುದಾನವನ್ನು ವರ್ಷದಲ್ಲಿಯೇ ನಿಗದಿಪಡಿಸಿದ ಕಾಮಗಾರಿಗೆ ಬಳಸಿ ಪೂರ್ಣಗೊಳಿಸಬೇಕು. ಮುಂಬರುವ ಮಾರ್ಚ ತಿಂಗಳೊಳಗೆ ಅನುದಾನವನ್ನು ಬಳಸದೇ ಹೋದರೆ ಮೀಸಲಿಟ್ಟ ಹಣ ಮರಳಿ ಸರಕಾರಕ್ಕೆ ಹೋಗುತ್ತದೆ. ಇದರಿಂದ ಗ್ರಾಪಂ ವ್ಯಾಪ್ತಿಯಲ್ಲಿ ಅಭಿವೃದ್ಧಿ ಕೆಲಸಗಳು ಆಗದೇ ಹೋಗುವ ಆತಂಕ ಜನರಲ್ಲಿದೆ.
ಕುಡಿಯುವ ನೀರಿನ ಸಮಸ್ಯೆ: ಲಿಂಗನಮಠ ಗ್ರಾಮದಲ್ಲಿ ಬೇಸಿಗೆಯ ದಿನಗಳಲ್ಲಿ 8-10 ದಿನಕ್ಕೊಮ್ಮೆ ನೀರು ಪೂರೈಕೆಯಾಗುತ್ತಿತ್ತು ಆದರೆ ಈಗ ಮುಂಗಾರು ಮಳೆಯಾದರು ಅದೇ ಪದ್ಧತಿ ಜಾರಿಯಲ್ಲಿದೆ ಎಕೆಂದರೆ ಹೊಸಲಿಂಗಮಠ ಗ್ರಾಮಕ್ಕೆ ನೀರು ಪೂರೈಕೆಯಾಗುವ ಬೋರವೆಲ್ ಮೋಟರ್ ಕೆಟ್ಟು 15 ದಿನಗಳಾದರೂ ಇನ್ನೂವರೆಗೂ ರೀಪೆರಿ ಕಾರ್ಯ ಮಾಡಿಲ್ಲ ಎಂದು ಜನರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ನಾಗರಿಕರ ಆಕ್ರೋಶ:
ಜಿಲ್ಲಾಡಳಿತ, ತಾಲೂಕಾಡಾಳಿತ ಹಾಗೂ ಗ್ರಾಮ ಪಂಚಾಯತ ಆಡಳಿತ ಕಾರ್ಯವೈಖರಿಗೆ ಜನತೆ ಬೇಸತ್ತಿದು, ಗ್ರಾಪಂ ಅಭಿವೃದ್ಧಿ ಅಧಿಕಾರಿಯೇ ಇಲ್ಲದಿರುವುದರಿಂದ ಗ್ರಾಪಂ ನಲ್ಲಿರುವ ಕಾರ್ಯಗಳಿಗೆ ಹತೋಟಿ ಇಲ್ಲದಂತಾಗಿದೆ ಎಂದು ನಾಗರಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಇನ್ನಾದರೂ ಜಿಲ್ಲಾಡಳಿತ, ತಾಲೂಕಾಡಾಳಿತ ಅಧಿಕಾರಿಗಳು ಗ್ರಾಪಂ ಸಿಬ್ಬಂದಿಗಳಿಗೆ ಹಾಗೂ ಚುನಾಯಿತ ಜನಪ್ರತಿನಿಧಿಗಳಿಗೆ ಚುರುಕು ಮುಟ್ಟಿಸುತ್ತಾರಾ.? ಖಾಲಿಯಿದ್ದ ಪಿಡಿಒ ಸ್ಥಾನವನ್ನು ಭರ್ತಿ ಮಾಡುವ ಕೆಲಸವನ್ನು ಸಂಭಂಧಪಟ್ಟವರು ಮಾಡುತ್ತಾರೆಯೇ ಎಂಬುದು ನಾಗರಿಕರ ಯಕ್ಷ ಪ್ರಶ್ನೆಯಾಗಿದೆ.
ಶಿವಲಿಂಗಪ್ಪ ಹಲಸಗಿ, ಲಿಂಗನಮಠ ಗ್ರಾಮದ ಹಿರಿಯ :
ವಿಶ್ವವಾಣಿ ವರದಿಗಾರರಿಗೆ ಲಿಖಿತ ದೂರು ನೀಡಿ ಮಾತನಾಡಿದ ಕಳೆದ ಹಲವಾರು ವರ್ಷಗಳಿಂದ ಲಿಂಗನಮಠ ಗ್ರಾಪಂ ನಲ್ಲಿ ಅವ್ಯವಹಾರ ತಾಂಡವಾಡುತ್ತಿದೆ. ಜೋತೆಗೆ ಗ್ರಾಪಂ ವ್ಯಾಪ್ತಿಯಲ್ಲಿ ನರೇಗಾ ಕೆಲಸದಲ್ಲಿ ಅವ್ಯವಹಾರ ನಡೆಸಿ ಲಕ್ಷಾಂತರ ರೂಪಾಯಿ ಲೂಟಿ ಮಾಡಿದ್ದಾರೆ. ಹಾಗೂ ಗ್ರಾಪಂ ಗೆ ಸಂಭಂಧಪಟ್ಟ ಗೋಮಾಳವು ನುಂಗಿದ್ದಾರೆ. ಆದ್ದರಿಂದ ಸಂಭಂಧಪಟ್ಟ ಅಧಿಕಾರಿಗಳು ಇವೆಲ್ಲದರ ಬಗ್ಗೆ ಸೂಕ್ತ ತನಿಖೆ ಮಾಡಬೇಕೆಂದು ಆಗ್ರಹಿಸಿದ್ದಾರೆ.
ಮಹ್ಮದಇಕಬಾಲ ದಾದೂನವರ ಹಾಗೂ ಮುಸ್ತಫಾ ದಾಸ್ತಿಕೊಪ್ಪ, ಲಿಂಗನಮಠ ಗ್ರಾಪಂ ಸದಸ್ಯರು :
ನಾವು ವಾರ್ಡ ಮಟ್ಟದಲ್ಲಿ ಎನೇ ಕಾರ್ಯ ಮಾಡಬೇಕೆಂದರೆ ಸಾರ್ವಜನಿಕರ ಹಾಗೂ ಆಡಳಿತ ಮಂಡಳಿಯವರ ಅಗತ್ಯವಾಗಿದೆ. ಆದರೆ ನಾವು ಎನಾದರೂ ಕಾರ್ಯ ಮಾಡಬೇಕೆಂದರೇ ಗ್ರಾಪಂ ಅಧ್ಯಕ್ಷರ ಸಹಕಾರ ಸರಿಯಾಗಿ ಸಿಗುತ್ತಿಲ್ಲ ಹಾಗೂ ನಮ್ಮ ಸಮಸ್ಯೆಗಳಿಗೆ ಸರಿಯಾಗಿ ಸ್ಪಂದಿಸುತ್ತಿಲ್ಲ.
ಡಾ.ಕೆ.ಬಿ.ಹಿರೇಮಠ, ಲಿಂಗನಮಠ ಗ್ರಾಪಂ ಅಧ್ಯಕ್ಷ :
ನನ್ನ ಅಧ್ಯಕ್ಷ ಅವಧಿಯಲ್ಲಿ ಪ್ರಯತ್ನಕ್ಕೂ ಮೀರಿ ಪ್ರಾಮಾಣಿಕವಾಗಿ ಕೆಲಸ ಮಾಡಿದ್ದೆನೆ. ಒಂದು ವೇಳೆ ನಮ್ಮ ಆಡಳಿತ ಮಂಡಳಿಯವರಾಗಲಿ ಅಥವಾ ಗ್ರಾಪಂ ಸಿಬ್ಬಂದಿಗಳಾಗಲಿ ಅವ್ಯವಹಾರ ಮಾಡಿದ್ದು ಕಂಡು ಬಂದರೇ ನನ್ನ ಯಾವುದೇ ಅಭ್ಯಂತರವಿಲ್ಲದೆ ಸಂಭಂಧಪಟ್ಟವರು ಸೂಕ್ತ ತನಿಖೆ ಮಾಡಬಹುದು. ಒಂದು ವೇಳೆ ತಪ್ಪು ಮಾಡಿದವರು ಯಾರೇ ಆಗಿರಲಿ ಅವರ ಮೇಲೆ ಸೂಕ್ತ ಕ್ರಮ ಕೈಗೊಳ್ಳಬಹುದು.